Dieretuin in woestyn

Da ry die trein - da ry die trein, die Al Ain se trein! Ons het besluit terwyl die weer nog lekker is en nie te warm nie, alhoewel dit al in die lae dertigs is, om bietjie te gaan kyk wat die Al Ain se dieretuin vir ons kan wys. Ons het laat middag daar aangekom, want ons het eers bietjie deur die dorpie gaan ry.

Daar is 'n paar van hierdie treintjies, wat met wiele ry en nie op spore nie. Seuna wat natuurlik trein bevange is reken dis mos nie reg nie, maar as hy kan ry is dit seker maar reg so.

Ons wag maar die eerste keer dat die treintjie ry, nadat hulle stampvol gepak word. En die tweede keer moes ons soos afkop hoenders hardloop en druk en stoot om 'n gaatjie te kry.

Uiteindelik is ons op en hier gaan ons tjoekoe tjoeeeee, !! Ons het trein gery omdat ons gedink het die plek is baie groot en dat dit ons lank gaan vat om daardeur te loop, maar dit was glad nie die geval nie. Die dieretuin is nie so groot nie en na 'n half uur se ry is ons weer by die 'stasie'. En nogal met 'n ses minute stop by die snoepie. Mens kan sien dat daar mooi na die diere gekyk word, maar

die verskeidenheid is nie so groot soos byvoorbeeld Pretoria se dieretuin nie.

Dadda en boetie het natuurlik die oopte van die gras geniet, boeta was die varkie en dadda die wolf en was dit vir jou nou 'n gerond jaagery. Ons het hom so geniet, want hy leef homself so in die storie en speelietjie in, dat die beentjies so lam word dat hy nie kan 'hapet'-(hardloop) nie, soos hy dit se.

Mens sou nou regtig gedink het na al daardie gehapet en spring en lag dat die man moeg sou wees en in die kar sou slaap oppad huis toe, maar nogal nie, ons ou liefieding wou toe stories hoor van al die diere wat hy gesien het en wou weet wat hulle alles eet en al sulke dinge, en toe ons by die huis kom moes ons vir hom hulle teken dat hy kon inkleur.


Dit was nou nie heeltemal wat ons verwag het nie, maar dit was 'n baie lekker uitstappie, en nou weet ons ook hoe die dieretuin hier tussen die sand en klipberge lyk.

Is dit eerlik of vanselfsprekend?

Dit is nou nie die eerste keer wat ons hierdie verskynsel raakloop by die brandstof stasie nie. Ons het al 'n klomp note ook so gesien rond le, maar vandag moes ek net 'n foto hiervan neem, want dit "tickel my mind"....

Daar loop 'n magdom mense hier verby en deur die pompe waar die geld so los le, en niemand kyk eers daarna nie, dit is asof niemand dit eers raak sien nie,....

Dit is regtig so snaaks, en onnatuurlik, want in ons 'geboorteland' word mense se lewens geneem vir R10.00 en selfs minder.

Ja dit lyk nie na baie geld nie, maar geld is geld, en dit le daar in die middel van alles.

Nou wonder ek is die mense net baie eerlik, of is hulle regtig "stuped", of dalk iets anders-

Is hulle bang vir die land se reels en wette, want mens kan baie vinnig en selfs onskuldig in die tronk beland, of self uit die land gedeporteer word.

Of is dit as gevolg van hulle geloof? Ek moet se, ek respekteer hulle nogal in n sekere mate vir die feit dat hulle so religieus is, wat dalk 'n impak kan he op sekere elemente soos diefstal ens.
Verseker is daar ook sulke elemente soos misdaad hier, maar dit word dadelik vasgevat, dalk is dit 'n bydraende rede, die wette is nie net goeie advies nie, dit is wette wat toegepas word!

Nou kan mens jouself deur verskeie redenasies neem om die wortel van goed en kwaad te ondersoek, en te wonder net hoekom 'n land soos ons geboorteland so deur misdaad getreiter word, en hier waar ons nou bly, het dit nie eens 'n impak op die mense se lewens nie. En ironies genoeg, mens raak nogal gou gewoond daaraan, die feit dat mens nie alles hoef te sluit en weg te steek nie,...die lewe soos wat God bedoel het dit moet wees, om ander se goed en hulleself ook uit te los en te respekteer, nou nie dat die respekteer gedeelte altyd hier toegepas word nie, maar misdaad is hier beslis nie 'n alledaagse verskynsel nie.

Eerste Kennismaking.

Glo dit of nie, maar ons is oor 3 weke van nou af al 'n jaar hier in die U.A.E, en hierdie was die eerste keer wat ons lewendige kamele gesien het.

Hierdie klein mensie van my was so verstom oor hierdie groot diere hier reg voor hom, dat hy nie kon ophou kyk nie, en glo my as ek se, hyt nie 'n woord gese nie. Hy was so stil en so ge-intreseerd in hierdie knopperige dier dat hy net gestaar het, dit was so aansteeklik dat daddy ook net gestaar het. Dit was so asof hulle gereken het-laat ons niks se of doen terwyl die grote menere hul middagete geniet, nie.

Nadat hy goed na die kamele gekyk het, het hy gereken dit is darm maar 'n knopperige dier, want hulle het 'n knop in hulle keel en op hul rug en van hulle op hulle bene ook.

Wow, goed ge-observeer my seuna, want mamma het nog nooit so daarna gekyk nie!

Wha- ha -ha!!

Om die draai, het dogtertjies in hul tradisionele drag gespeel, en gedans. Natuurlik toe hulle hierdie gouekop seuna van ons sien, was al die oe op ons gerig, en het een van die dogtertjies na die mamma toe gehardloop en seker maar gevra of hulle na hom kan uitreik?

Met 'n duidelike kopskud 'ja' van die mamma af, hardloop of bestorm hulle ons ou seunie tegemoed. Gelukkig is hy nie 'n skrikkerige seunie nie en staan hy toe sy man goed tussen die 'girls'! Onmiddelik word sy hoed afgehaal en hulle bevat en bevoel sy haartjies, sy brilletjies word ook af gehaal om na sy ogies te kyk, en van hulle soen hom sommer in sy nekkie, en ander vryf sy handjies. Nadat hulle hom bevoel en bevat het, het ons maar met gebare taal toestemming gevra om 'n paar fotos te neem.

Na die tyd reken ons ou boetie - Shoe mamma, ek dink hulle like my! Hulle kan maar my maatjies wees.

Hier is hulle in hul pragtige helder tradisionele uitrustings. Hulle het die mooiste versierings op hul koppies en om hul nekkies. Selfs hul handjies en voetjies is gehenna.


Hierdie ou dogtertjie was vir my te pragtig. Hoe mooi lyk sy met die goue nekkie, oortjies en koppie.

Hier vat hulle vir boeta om saam met hulle te speel, hulle wys vir hom hoe stoot mens die hout wiellietjie, en na 'n rukkie is dit al in die ronte en hul jaag mekaar, en dit is 'n gekraai van lag en kinder stemmetjies.

Hierdie klomp is die seuntjies, hulle was besig om te dans.

Hulle lyk sommer na groot meneertjies met die wit klere.

Hierdie 3 kamele kyk so gelyk na hul eienaars, kompleet asof hulle so pas van hul base geskinder het, dit was sekerlik 'n lekker juicy storie...!

Dit was 'n lekker uitstappie. Dit was nou ons eerste kennismaking met die sandmense en diere, en dit was heel interessant.

'n Volle 3 jaartjies oud!

Dit voel soos nou die dag toe ons, ons klein prem babatjie huis toe gebring het,

hy was maar 1.6kg met geboorte en het maar net 40ml melkkies op 'n slag gedrink, na 21 daggies in die icu en baie dae en nagte se gebed kon ons die klien bondeltjie huis toe vat met 'n gewig van 2kg.

Vandag is my liefling seuntjie 3 jaartjies oud.

Hy is 'n begaafde seuntjie met 'n normale gewig. En hy is 'n ware geseende,gesalfde,gesonde seun van God! Daarom noem ons hom G-man!

Ons het lekker parytjie gehou. Dit was nou nie so groot soos sy vorige 2 verjaarsdae met al die familie, maatjies, niggies en nefies wat daar was nie, maar dit was net so lekker met die maatjies wat wel hier was. Ons kon nou nie fotos van al die maatjies neem nie a.g.v. hulle mamma se geloof, maar die ander het so lekker gespeel hulle het nie eers die fotograaf raakgesien nie.

Dit was 'n lekker 2 dae en dankie vir almal wat dit mootlik vir ons gemaak het om dit vir ons kliending spesiaal te maak.

Liefie seun ,- jou ma se asempie

pappa se sterrietjie en Jay se kennietjie!

Ouma se sonstraaltjie en oupa se laaitie!!

Ons is oneindig lief vir jou!

Ons dank ons Dadda die Skepper van jou vir jou!

Ons gebed vir jou ons seuna is dat Vader jou nog meer voorspoedig sal maak in al jou wee, jou sal beskerm, en jou in Sy Hande sal dra vir die res van jou lewe.

Gaan en wees geseend tot eer van God in Jesus naam!!